Американскиот Стејт департмент објави ажурирана мапа со предупредувања за патување за земјите низ светот, со цел да им обезбеди на американските граѓани појасна слика за безбедносните услови при меѓународни патувања во пресрет на 2026 година.
Според анализата, која ја пренесува и „Њузвик“, земјите се поделени во четири нивоа на ризик, при што се земаат предвид фактори како криминал, тероризам, граѓански немири, пристап до здравствена заштита, природни катастрофи и актуелни политички и безбедносни состојби.
Северна Македонија формално е вклучена во првата категорија, која подразбира примена на вообичаени мерки на претпазливост и се смета за најниско ниво на ризик. Во оваа група се и земји како Канада, Јапонија, Норвешка, Швајцарија, Португалија и други. Сепак, во рамки на оваа категорија, Македонија заедно со Хрватска е означена како земја со повисок безбедносен ризик, поради одредени безбедносни фактори.
Во втората категорија, каде што на Американците им се препорачува дополнително внимание, се наоѓаат земји како Албанија, Србија, Франција, Германија, Италија, Шпанија и Обединетото Кралство, при што дел од нив се дополнително означени како земји со висок ризик.
Третата категорија опфаќа дестинации за кои се препорачува повторно преиспитување на патувањето, меѓу кои се Непал, Танзанија и Уганда, додека четвртата и најризична категорија вклучува земји во кои се советува воопшто да не се патува, како Авганистан, Русија, Иран, Сирија, Украина и Венецуела.
Американските власти наведуваат дека овие предупредувања треба да им помогнат на патниците подобро да ги планираат своите патувања и да бидат информирани за можните ризици по личната безбедност.
