Берлин се разбуди под снежна покривка во среда, 31 декември, при што за само неколку часа градот доби сосема поинаква физиономија. Сивата зимска рутина беше заменета со тивка зимска идилија, со бели улици, покриви и плоштади.
Во централното градско подрачје, околу Бранденбуршката порта и Берлинската катедрала, можеше да се забележат бројни туристи и берлинчани кои ја искористија снежната пауза за прошетки, фотографирање и игра со децата. Додека снегот продолжуваше да паѓа, празничната атмосфера се чувствуваше на секој чекор.
За многумина, ваквите сцени имаат и посебна симболика, бидејќи снегот во последните денови од годината се доживува како редок декемвриски „подарок“ во германската престолнина. Наместо вообичаените влажни и сиви зими, градот накратко доби помирен и потивок ритам.
Снегулките го „омекнаа“ секојдневниот метеж, а празничното расположение се пресели и на улиците, создавајќи чувство на зимска разгледница, барем додека студот повторно не ја наметне својата реалност.
