Семејствата на жртвите од пожарот во кочанскиот клуб „Пулс“ изразија длабоко сочувство кон семејствата на загинатите и повредените во трагичниот пожар во бар во швајцарскиот скијачки центар Кран-Монтана.
„Со скршено срце ја примивме веста за Швајцарија. Нè врати во болката што никогаш не замина по нашата трагедија во Кочани“, велат родителите, додавајќи дека знаат што значи ненадејно да ти се урне светот, кога останува празно столче, а тишината зборува погласно од зборовите.
Тие истакнуваат дека во вакви моменти најважна е човечноста и подадената рака: „Сакаме семејствата на загинатите и повредените да знаат дека не се сами. Стоиме на располагање за секаква помош – со разбирање, тивка поддршка и со срце што ја познава истата рана.“
Родителите на жртвите од Кочани посочуваат дека мислите и молитвите им се со преживеаните и со семејствата на починатите, и ја испраќаат својата порака: „Нека почиваат во мир оние што заминаа, а на живите нека им биде дадена сила да продолжат.“
Пожарот во Кран-Монтана се случи за време на новогодишната забава во луксузен бар, предизвикувајќи голема трагедија и бројни повреди, што ја потсетува меѓународната јавност на слични несреќи како кочанската трагедија.
