Градоначалникот на Њујорк, Зохран Мамдани, жестоко ја критикуваше ноќната американска операција во Венецуела, при која беа уапсени претседателот Николас Мадуро и неговата сопруга Силија Флорес. Тој оцени дека „едностраниот напад врз суверена нација“ претставува чин на војна и кршење на американското и меѓународното право.
На платформата X, Мамдани истакна дека бил информиран за апсењето и за планираното затворање на Мадуро во федерален затвор во Њујорк. „Овој очигледен притисок за промена на режимот директно влијае на жителите на Њујорк, вклучувајќи ги десетиците илјади Венецуелци кои го нарекуваат овој град свој дом. Мојот фокус е нивната безбедност, а администрацијата ќе продолжи да ја следи ситуацијата и да издава релевантни упатства“, изјави градоначалникот.
Претседателот Доналд Трамп, пак, истакна дека САД ќе ја водат Венецуела сè додека не се спроведе „безбедна и уредна транзиција на власта“ и најави дека американските нафтени компании ќе започнат експлоатација во земјата. Американските сили, според него, извршиле воздушни напади и го уапсиле Мадуро и неговата сопруга.
Главниот обвинител на САД, Пам Бонди, потврди дека Мадуро и Флорес ќе се соочат со обвинение издадено од суд во Њујорк.
