Венецуелскиот министер за одбрана повика на единство по нападите: „Армијата е на нозе низ целата земја“

Министерот за одбрана на Венецуела, Владимир Падрино Лопез, соопшти дека вооружените сили се распоредени низ целата држава по американските напади врз земјата, повикувајќи на обединет фронт против, како што ја нарече, најтешката агресија со која Венецуела досега се соочила.

Во објава на социјалните мрежи, Падрино Лопез нагласи дека сите воени формации дејствуваат согласно „наредбите на претседателот Мадуро“, без да се осврне на тврдењата дека венецуелскиот лидер е уапсен.

„Тие нè нападнаа, но нема да нè скршат. Ќе изградиме неуништлив ѕид на отпор. Нашиот повик е мир, но нашата историја е борба за слобода“, порача министерот, апелирајќи до граѓаните да останат смирени и обединети. Тој предупреди и на ризикот од анархија и неред, оценувајќи дека паниката е дел од стратегијата на непријателот.

Падрино Лопез изјави дека властите собираат податоци за загинатите и повредените и тврди дека американските напади погодиле и цивилни области. Воедно, тој истакна дека Венецуела ќе се спротивстави на секое присуство на странски воени сили на нејзина територија.