Вучиќ најави повторно воведување на воената служба во Србија: „Ќе ја зајакнеме земјата и ќе влијаеме на младите“

За време на обиколката на новиот објект за сместување и обука на Одделот за воена полиција за специјални намени „Кобра“ во касарната „Ваша Чарапиќ“ во Белград, српскиот претседател Александар Вучиќ зборуваше за повторното воведување на воената служба за младите.

Вучиќ истакна дека животот на младите денес е поинаков во споредба со претходните генерации. „Младите луѓе живеат поинаков живот и ние мора да разбереме што се променило. Моите родители со најголема чест го чекаа моментот кога нивниот син отиде во војска. Сега се поинакви времиња, луѓето живеат во своите телефони со виртуелни обврски, но знаеме какви се животите на државите“, рече тој.

Претседателот додаде дека новата воена служба, долга 75 дена, ќе ја зајакне одбраната на земјата, како и ќе влијае на образованието, одговорноста и сериозноста кај младите. Тој истакна дека учесниците ќе имаат приходи кои ќе ги трошат во регионите каде ќе се реализира обуката, со што ќе се поддржи развојот на делумно погранични и помалку економски развиени области.

„Оваа година ќе следи донесување на сите формални одлуки, сакаме да го правиме тоа во важни центри. Тие момчиња и девојчиња ќе имаат прилика да го искусат тоа, а земјата ќе биде посилна“, рече Вучиќ.