Дирекцијата за заштита и спасување во новата 2026 година влегува со засилен авио-капацитет, откако пензионираниот армиски полковник и воен пилот Роберт Малезански станува дел од институцијата. Малезански, со договор со директорот на ДЗС Стојанче Ангелов, ја прекинал воената пензија и се вработува професионално како раководител на авио-одделението, активен пилот и член на најтесниот кабинет на директорот.
Во текот на својата богата воена кариера, Малезански управувал со повеќе типови летала, меѓу кои борбени авиони „галеб“, „супер галеб“, „МиГ-21“, „сухој-25“, како и борбени хеликоптери „Ми-17“ и „Ми-24“, но и различни спортски авиони. Имал и повеќе командни функции, меѓу кои и командант на Воздухопловниот винг на Армијата, а важи и за инструктор за летање и пробен пилот.
Со неговото ангажирање, ДЗС во 2026 година ќе располага со вкупно пет пилоти – тројца професионално вработени во авио-одделението и двајца пензионирани пилоти ангажирани со договор на дело.
Од Дирекцијата информираат дека е обезбедена согласност од Министерството за финансии за вработување на уште двајца пилоти за авионите „ер трактор“. Јавниот оглас за новите работни места ќе биде објавен дополнително.
