Македонското Министерство за надворешни работи остро одговори на изјавите од Софија, откако бугарското МНР јавно соопшти дека не го признава македонскиот јазик. Од Скопје порачаа дека вакви ставови се чекор назад и дека од земја-членка на Европската унија очекуваат однесување во духот на европските вредности, меѓу кои и целосно почитување на јазичниот и културниот идентитет на соседите.
Во реакцијата се нагласува дека Македонија и понатаму останува пример на европско ниво кога станува збор за заштитата и унапредувањето на правата на заедниците. Како што наведуваат од МНР, државата е препознаена од релевантни меѓународни институции по инклузивните политики и посветеноста на еднаквоста, и таа насока нема да се менува.
„Нашата определба е јасна – општество засновано на еднакви можности, инклузија и доследна примена на политики во интерес на сите граѓани“, порачуваат од Министерството.
Од таму потсетуваат и дека земјава строго се придржува до европските правила и принципот на напредување според заслуги во процесот на проширување на Европската унија. Како конкретен доказ го посочуваат Предлог-акцискиот план за заштита и унапредување на правата на заедниците, кој е изработен на македонски и англиски јазик, со учество на домашни и странски експерти и во тесна соработка со Советот на Европа и Европската комисија.
Документот, според МНР, содржи прецизни мерки, јасни рокови и утврдени институционални надлежности и е целосно усогласен со највисоките европски и меѓународни стандарди. Процесот на негово креирање траел во повеќе фази од 2023 година, а финалната верзија интензивно се доработувала во втората половина од 2025 година.
Во текот на целиот процес, додаваат од Министерството, активно биле вклучени експерти од областа на меѓународното право, човековите и малцинските права, при што и Советот на Европа и Европската комисија оцениле дека планот ги опфаќа сите релевантни европски стандарди.
Со оваа реакција, македонското МНР испраќа јасна порака дека земјава нема да отстапи од европскиот пат, ниту од заштитата на својот јазик и идентитет.
