Претседателот на Владата на Република Македонија, Христијан Мицкоски, денес ќе присуствува на промоцијата на новата опрема за управување со отпад, наменета за јавните комунални претпријатија во Пелагонискиот и Југозападниот регион. Настанот ќе се одржи на паркингот пред спортската сала „Боро Чурлевски“.
Станува збор за возила, контејнери и кантите за отпад, кои се дел од вложувањето на Владата, Министерството за животна средина и просторно планирање (МЖСПП), како и на меѓународните партнери, со цел унапредување на локалниот систем за управување со отпад.
Според најавите, новата опрема ќе го олесни работењето на јавните комунални претпријатија, ќе го подобри собирањето на отпадот и ќе ја зголеми хигиената во урбаните и руралните средини. Особено внимание се посветува на селекцијата на отпадот – жолтите садови ќе бидат наменети за сува фракција, а зелените за органска, односно „мокра“ фракција, со што ќе се поддржи рециклирањето.
Проектот е дел од подготовките за идната регионална депонија во Новаци и претоварните станици во Кичево, Охрид, Прилеп и Дебар, што се очекува значително да ја намали појавата на диви депонии и неформално фрлање на отпадот.
Премиерот Мицкоски ќе даде изјава за медиумите на самиот настан, во која ќе ги потенцира очекуваните придобивки од оваа инвестиција и продолжувањето на соработката меѓу Владата и локалните самоуправи за зачувување на животната средина.
