Естонската Iute Group, која е сопственик на Иуте Македонија, ја доби државно организираната тендерска постапка во Украина за преземање на дел од средствата и депозитните обврски на банката RWS Bank Украина, со што се отвора патот за основање на нова целосно дигитална банка на украинскиот пазар.
Според договорот, Iute ќе ја формира банката под работниот назив IuteBank, која ќе биде изградена од темел како лиценцирана дигитална финансиска институција под супервизија на Народната банка на Украина. Финалното пренесување на околу 13.000 сметки и клиенти ќе се реализира по официјалното одобрување на регулаторот, што се очекува до крајот на месецов.
Вкупната инвестиција на групацијата во Украина се проценува на 15 милиони евра, а увлезот на Iute во украинскиот банкарски сектор претставува значаен чекор во географската експанзија на групацијата, како дел од стратегијата за развој на дигитално банкарство во источна Европа.
Новата банка ќе нуди широк спектар услуги, вклучувајќи отварање на сметки, плаќања, депозити, кредити и други основни банкарски производи за физички и правни лица, со силен фокус на дигитално искуство и модерни технологии.
Иуте нагласува дека овој потег не само што го отвора украинскиот пазар за нови финансиски решенија, туку и ја зацврстува позицијата на групацијата како иновативен играч во финтек секторот во Европа.
