Тајната служба на Соединетите Американски Држави започна една од најголемите кампањи за регрутирање во својата историја, со цел да ангажира илјадници нови агенти и офицери, објави „Вашингтон пост“.
Проширувањето има за цел да го намали оптоварувањето на постојниот кадар и да ја подготви агенцијата за клучните настани во 2028 година, вклучувајќи ги претседателските избори и Летните олимписки игри во Лос Анџелес.
Раководството планира да вработи околу 4.000 нови лица, со што вкупниот број на вработени првпат би надминал 10.000, што претставува зголемување од околу 20%. Специјалните агенти би се зголемиле од 3.500 на околу 5.000, а униформираната дивизија би достигнала 2.000 припадници.
„Вашингтон пост“ истакнува дека проширувањето на службата ќе овозможи помалку потпирање на други агенции при обезбедувањето на високоризични настани. Недоволната координација беше посочена како причина за безбедносниот пропуст при обидот за атентат врз Доналд Трамп во 2024 година во Батлер, Пенсилванија.
Раководството на Тајната служба нагласува дека, и покрај забрзаните процедури за вработување, стандардите за избор на нови агенти нема да бидат намалени.
