Агенцијата за храна и ветеринарство (АХВ) по вонреден инспекциски надзор во пансионот за кучиња „Ав ав хепи догс“ не утврди присуство на заразна болест, туку само издаде препораки за механичко чистење и темелна дезинфекција на објектот. Пансионот ќе остане затворен времено во период од 21 ден, колку што изнесува инкубацискиот период за сомнителната болест.
АХВ им препорача на сопствениците итно да ги преземат своите миленици и да ги тестираат доколку постои сомнеж за заразна болест. Од агенцијата истакнуваат дека законски немаат овластување да утврдуваат од што угинало кучето кое претходно било сместено во пансионот.
Досега ниту еден сопственик не пријавил болест кај своето куче по престојот во пансионот, иако јавноста беше алармирана со сведоштвото на Ана Пејковска, која објави дека нејзиното куче Мајло починало по престој во пансионот. По нејзините објави следеа и други сведоштва од сопственици и поранешна практикантка, кои изнесоа наводи за условите и односот кон животните. Пансионот, пак, негираше присуство на парвовирус и најави правни чекори против, како што велат, лажно информирање.
Од АХВ апелираат до сопствениците на кучиња да ги вакцинираат своите миленици, да ги тестираат при сомнеж за заразна болест и да се информираат исклучиво преку официјалните канали, додека целосната постапка не заврши.
