Реката Зајашка денеска се излеа на улицата „Прилепска“ во Кичево, предизвикувајќи поплавување на дел од околниот простор и потенцијална закана за неколку објекти во близина.
Екипи на Јавното претпријатие „Комуналец“ веднаш интервенираа со градежна механизација, работат на извлекување на водата и на изградба на заштитни насипи со цел да се спречи натамошно ширење на излевањето и да се заштитат куќите и имотот на граѓаните.
Паралелно со ова, друга екипа на „Комуналец“ интервенира во населбата Иванидол, каде што се расчистува запушен канал кој дополнително го отежнувал одведувањето на водата.
Од надлежните информираат дека состојбата засега е под контрола и дека екипите ќе останат на терен сè додека не се стабилизира ситуацијата. Во случај на влошување, ќе биде известена и Дирекцијата за заштита и спасување за преземање дополнителни мерки.
