Нови сериозни откритија излегуваат на површина од истрагата за смртоносниот пожар во барот „Ле Констелејшн“ во швајцарскиот ски-центар Кранс-Монтана. Сопственикот на објектот, Жак Морети, пред истражните органи признал дека една од излезните врати била заклучена во моментот на избувнување на огнот, а звучната изолација била поставена со материјали купени од обична продавница за градежни производи.
Според наводите на медиумите што ја следат истрагата, Морети изјавил дека кога пристигнал на местото и ја отклучил сервисната врата однадвор, зад неа веќе имало тела на жртви кои не успеале да избегаат од просторијата исполнета со чад и пламен. Ова признание дополнително ја продлабочува тежината на случајот и ја зголемува одговорноста на сопственикот.
Второто клучно признание се однесува на звучната изолација во барот, која, според Морети, била заменета лично од него, со материјали што не биле наменети за ваква намена и не биле огноотпорни. Токму тие материјали, според експертите, можеле значително да придонесат за брзото ширење на пожарот и густината на чадот.
Овие факти отворија сериозна правна расправа околу тоа каква квалификација ќе добие делото. Обвинителството настојува да докаже дека сопственикот и одговорните лица биле свесни за ризикот од заклучената врата и несоодветните материјали, што би можело да доведе до обвинение за убиство со евентуална умисла, за кое во Швајцарија се предвидува казна и до 20 години затвор.
Одбраната, пак, смета дека и покрај новите признанија, правно е тешко да се докаже умисла. Адвокатот Кристијан Ленц наведува дека најверојатно случајот ќе остане во рамките на дела од небрежност, како тешка телесна повреда и убиство од небрежност, за кои максималната казна би изнесувала околу 4,5 години затвор.
Истрагата продолжува, а семејствата на жртвите очекуваат одговори и правична казна за трагедијата што го потресе швајцарското јавно мислење.
