Рускиот претседател Владимир Путин изјави дека ги разбира и оправдува изјавите на поранешниот американски претседател Доналд Трамп за преземање контрола врз Гренланд, нагласувајќи дека станува збор за долгорочна и сериозна стратегија на САД, а не за политичка реторика.
Путин објасни дека американскиот интерес за Гренланд има длабоки историски корени, кои датираат уште од 1860-тите години, кога администрацијата во Вашингтон разгледувала можност за анексија на Гренланд и Исланд, но без поддршка од Конгресот.
„Во 1910 година бил подготвен трипартитен договор меѓу САД, Германија и Данска, со кој Гренланд требало да ѝ припадне на Америка, но договорот никогаш не бил реализиран. За време на Втората светска војна, САД воспоставија воени бази на островот, а по војната дури понудија и да го купат од Данска“, истакна Путин.
Според рускиот претседател, интересот на САД кон Гренланд не е случаен, туку дел од поширока стратегија за геополитичко, воено и економско присуство во Арктикот, регион кој станува сè поважен поради климатските промени, новите поморски рути и природните ресурси.
„Со други зборови, САД имаат сериозни и долгорочни планови поврзани со Гренланд. Тие систематски ќе ги унапредуваат своите интереси во Арктикот“, нагласи Путин.
Изјавата доаѓа во време на зголемени геополитички тензии меѓу големите сили, при што Арктикот сè повеќе се гледа како клучна зона за идните глобални односи меѓу Соединетите Американски Држави, Русија и другите арктички земји.
Иако официјално Гренланд останува автономна територија во рамки на Кралството Данска, темата за неговата стратешка улога повторно влегува во фокусот на светската политика.
ВИДЕОТО МОЖЕ ДА ГО ПОГЛЕДНЕТЕ ТУКА
