Европската Унија може да помогне во обезбедување на безбедноста на Гренланд, доколку Данска го побара тоа, изјави денеска европскиот комесар за одбрана Андриус Кубилиус, истакнувајќи дека евентуална окупација на островот од страна на САД би била „крај на НАТО“.
Претседателот Доналд Трамп изјави дека САД мора да го поседуваат Гренланд, автономен дел од Кралството Данска, за да спречат Русија или Кина да ја заземат стратешки лоцираната и богата со минерали арктичка територија. Трамп нагласи дека сегашното американско воено присуство таму не е доволно.
Данска и САД, двете членки на НАТО, треба да одржат средба оваа недела за да разговараат за Гренланд. Од островот и Данска истакнаа дека Гренланд не е на продажба, но Трамп не ја исклучи можноста за преземање со сила.
„Се согласувам со данскиот премиер дека тоа ќе биде крај на НАТО, а и меѓу луѓето тоа ќе има многу негативни последици“, изјави Кубилиус за Ројтерс на безбедносна конференција во Шведска, додавајќи дека вакво дејствие би имало „многу длабоко негативно влијание врз трансатлантските односи“.
Кубилиус потенцира дека, иако не очекува САД да извршат воена инвазија, членот 42.7 од Договорот за Европската Унија ги обврзува земјите-членки да ѝ помогнат на Данска во случај на воена агресија.
„Ќе зависи од реакцијата на Данска, но постои обврска земјите-членки да побараат меѓусебна помош ако друга земја се соочи со воена агресија“, рече Кубилиус, додавајќи дека окупацијата би влијаела на сите аспекти на односите меѓу Европа и САД, вклучително и трговските.
Тој исто така посочи дека ЕУ може да обезбеди дополнителна безбедност за Гренланд, вклучително и преку воени бродови и капацитети против беспилотни летала, доколку Данска го побара тоа. Кубилиус нагласи дека Европа треба да ги изгради своите воени капацитети и да биде подготвена да се брани и без поддршка од САД, додавајќи дека во таков случај сегашниот облик на НАТО повеќе нема да постои.
