Француските Алпи се во трагична серија на лавини: само еден ден по смртта на три лица, вчера уште тројца скијачи го загубија животот во одделни инциденти. Лавините повторно го потсетуваат на опасноста што ја кријат планините за љубителите на снегот.
Во популарниот скијачки центар Ла План, британски државјанин на возраст од околу 50 години бил затрупан под 2,5 метри снег. Спасувачките тимови, составени од 52 лица, кучиња трагачи и хеликоптер, реагирале веднаш, но им биле потребни околу 50 минути за да го извлечат мажот – за жал, лекарите само можеле да констатираат смрт.
Во соседниот Куршевел, лавината однела уште еден живот. Трагедијата се случила во раните утрински часови, а локалните медиуми јавуваат за повеќе повредени скијачи и сноубордери и во центрите Тињ и Орел.
На северната граница со Швајцарија, 32-годишен маж кој скијал надвор од обележаните патеки во Валорсин бил фатен од лавина и фрлен врз дрво. Тој подоцна им подлегнал на повредите. Само ден претходно, истата област била погодена од серија лавини кои однеле уште три животи.
Локалните власти од Савоја предупредуваат: лавините се непредвидливи и опасни, а жителите и туристите се повикуваат да останат на означените патеки и да внимаваат. „Скијањето надвор од безбедните терени може да биде фатално“, предупредуваат тие, како одговор на растечкиот број трагедии.
