Вевчани повторно се подготвува за магијата на својот легендарен карневал. На 12 и 13 јануари, ова мало македонско село ќе се претвори во сцена на традиција, музика и шаренило кое го привлекува вниманието на цел Балкан. Централната поворка ќе се одржи на 13 јануари од 13 часот, кога карневалците од двете маала ќе се сретнат на плоштадот, во еден спектакуларен карневалски дефиле што го симболизира вечниот спој на минатото и сегашноста.
Карневалот не е само шоу, туку живо сведоштво на културното наследство на Вевчани кое брои околу 1.400 години. Со корени во паганските обичаи, надополнети со христијанска традиција и современа сатирична енергија, Вевчанскиот карневал е ритуал на прочистување и обновување – симболичен премин од старата во новата година, исполнет со весели игри, маски и духовитост.
А музиката ќе го запали карневалот уште повеќе. На 12 јануари, со почеток од 20 часот, вечерта ќе ја отвори рап-дуото „Пука козметика“, следени од „Влатко Лозаноски бенд“ и „Брас брадрс“, носејќи модерна поп и рок енергија низ улиците на Вевчани. Ден подоцна, на 13 јануари, од 20 часот, фолк-нотите ќе ја преоптоварат атмосферата со настапите на Благоја Грујовски, Влатко Миладиновски со оркестарот на Златко Миладиновски и традиционалниот Оркестар со зурли и тапани „Вевчани“. Програмата ќе достигне кулминација на полноќ со легендарниот Перо Бели и групата „Вип“, кои со музика ќе го испратат карневалот кон изворите, во симболичен чин на обнова и заедништво.
