Република Македонија се справува со последиците од обилните врнежи што ја погодија земјата изминативе денови. Поплавите и одроните на патиштата предизвикаа проблеми низ повеќе региони, но се забележува постепено стабилизирање на состојбата.
Во Битола, Могила и Новаци, водата што ја преплави почвата се повлекува, но нивото на реката Црна кај Новаци сè уште изнесува 320 см. Во Демир Хисар, оштетениот мост на Боишка река го блокира локалниот пат кон Мренога, а поплави се регистрирани во селата Жван и Единаковци. Ресен се справува со поплавените земјоделски површини, а една градежна машина работи на расчистување на коритото на Голема Река.
Во Охрид, заштитен насип изграден на реката Сушица спречи понатамошно излевање, но подрумите и дворовите сè уште се поплавени. Слична ситуација е и во Струга, каде селата Мислешево и Калишта се борат со поплавени дворови и обработливи површини, а процесот на санација се одвива бавно поради технички ограничувања. Во Дебар, и покрај зголемениот водостој на Радика, опасност од нови излевања засега нема, а патиштата се проодни со редовно расчистување на помали одрони.
Во Кичево, водостоите на Зајашка река и Треска се намалени, а евакуираните граѓани се сместени во спортската сала „Христо Узунов“, каде им е обезбедена грижа и минимални услови за престој. Во меѓувреме, се спроведуваат активности за расчистување на поплавените домови и дезинфекција.
Во ридско-планинските подрачја околу Кавадарци, патните правци Кавадарци – Мушов Гроб – Мрежичко, Мушов Гроб – Михајлово и Страгово – Горна Бошава се исчистени од снежната покривка која достигна до 15 см.
Во Ранковце, патниот правец кон селата П’клиште и Герман е непрооден поради снежни наноси. Екипите се на терен и активно го расчистуваат патот, но кашестиот снег го отежнува сообраќајот.
Тетово повторно се соочуваше со пад на карпа на патот кон село Бањиче, но сообраќајот е нормализиран по брзата интервенција. На патот кон Маврово, кај каменоломот во Гостивар, евидентиран е одрон, а активностите за расчистување се во тек.
