Лондон одобри изградба на најголемата кинеска амбасада во Европа

Кина доби зелено светло за изградба на нова мега амбасада во Лондон, која ќе се простира на околу 55.000 квадратни метри и ќе биде меѓу најголемите дипломатски мисии во светот. Одлуката доаѓа по повеќегодишни одложувања и силни реакции од локалното население, дел од британските пратеници и активисти од Хонг Конг.

Објектот ќе се гради во близина на Лондонската кула, на локацијата каде што до 1967 година се наоѓала Кралската ковница за пари. Површината на новата амбасада ќе биде околу десет пати поголема од сегашната кинеска дипломатска мисија во британската престолнина.

Според Ројтерс, одобрението за градба било издадено непосредно пред најавената посета на британскиот премиер Кир Стармер на Кина, што ќе биде прва посета на британски лидер на Пекинг од 2018 година. Неименувани британски и кинески извори наведуваат дека токму дозволата за изградба била клучен услов за реализација на посетата.

Проектот предизвика загриженост кај дел од американските и британските политичари, кои предупредуваат дека амбасадата, поради својата локација во близина на финансиски институции, би можела да биде искористена за разузнавачки активности, вклучително и преку подземната оптичка инфраструктура.

Кинеската влада го купи земјиштето уште во 2018 година, но претходните барања за дозвола беа одбиени во 2022 година. Минатата година, кинескиот претседател Си Џинпинг побара директна интервенција од Стармер за деблокирање на процесот.

Британските власти соопштија дека дозволата е издадена со „одредени услови“. Директорот на MI5, Кен Мекалум, изјави дека безбедносните служби можат да се справат со потенцијалните ризици, иако агенцијата предупреди дека постои континуирана закана од обиди на Кина да регрутира лица со пристап до британските институции.