Поранешниот европски комесар Јоханес Хан јасно испрати порака до Белград: пристапувањето кон Европската Унија не е можност за компромис. Во интервју за НИН, Хан нагласи дека Србија сè уште се соочува со бројни нерешени прашања, особено во однос на усогласеноста на надворешната политика со Брисел.
„Пристапувањето кон Европската унија е фундаментална одлука, не само за земјата кандидат, туку и за самата Унија. Во случајот со Србија, има уште многу отворени прашања, а усогласеноста со надворешната политика е прилично ниска“, рече Хан.
На прашањето дали е можно сите земји од Западен Балкан да бидат примени во ЕУ во пакет и по итна постапка, тој одговори дека процесот е исклучиво индивидуален. „Секоја земја кандидат за ЕУ се оценува според заслуги и исполнување на стандардите што ги бара членството. Нема кратки патеки и попусти“, потенцира Хан.
Тој додава дека и самите земји-членки имаат обврска да се подготват за проширување на Унијата, особено кога бројот на членки надминува 30. Според него, неопходна е промена на системот на донесување одлуки, од едногласно кон квалификувано мнозинство, за процесот да биде поефикасен.
„Ако целиот Западен Балкан се приклучи кон европското семејство, тоа ќе биде win-win ситуација – и за регионот, и за ЕУ. Но, за да се стигне до тоа, стандарди мора да се исполнат. Не можеме да се откажеме од нашите принципи“, додаде Хан.
Во контекст на Украина и Молдавија, кои се споменуваат како потенцијални членки, Хан истакнува дека нивниот напредок не може да ја замени потребата од исполнување на стандардите. „Дискусијата за Украина и Молдавија создаде нова динамика во процесот на проширување, но принципите остануваат исти – секоја земја кандидат мора да ги исполни критериумите на Унијата“, нагласува тој.
Во однос на конфликтот во Украина, Хан смета дека е неопходна значајна и ефикасна воена поддршка за да се постигне крај на војната, што би имало одвраќачки ефект врз Русија и би создало услови за прекин на огнот и преговори.
