Кина официјално го отфрли наводот дека претставува закана во Арктикот, реагирајќи на изјавата на НАТО за преговорите меѓу САД и Гренланд. Алијансата претходно објави дека разговорите имаат за цел да спречат Русија и Кина да имаат пристап до стратешкиот остров.
„Се спротивставуваме на практиката да се создаваат проблеми од ништо и да се користи Кина како изговор за себични интереси“, изјави портпаролот на кинеското Министерство за надворешни работи, Гуо Џијакун, на прес-конференција. Тој јасно го критикуваше планот на американскиот претседател Доналд Трамп да ја зајакне контролата врз Гренланд.
Трамп во декември минатата година нагласи дека контролата врз Гренланд е од витално значење за националната безбедност на САД. „Доволно е да го погледнете Гренланд – има руски и кинески бродови покрај брегот. Ние мораме да го имаме“, рече тогаш претседателот, подвлекувајќи ја стратешката важност на островот за САД.
