Валандовско вчера вечерта беше во фокусот на голема полициска акција, при што во рацете на истражителите завршија околу два килограми дрога. Четворица лица се лишени од слобода, а случајот го презема Основното јавно обвинителство во Гевгелија.
Според информации од МВР, околу 21:30 часот полициски службеници од СВР Струмица и ОВР Валандово извршиле претрес во домот на 22-годишниот С.Ј. и 29-годишниот Г.Т., двајцата од село Пирава. При влегувањето, полицијата ги затекнала додека вршеле мерење на марихуана. Биле пронајдени повеќе пакувања со марихуана, 110 семки од канабис и предмети со остатоци од дрога.
Следејќи ги доказите, полицијата извршила претрес и во домот на Г.Т., каде повторно се пронашле пакувања со марихуана и други остатоци од дрога. Дополнително, постојат основи за сомнение дека во овој случај се вмешани и 47-годишниот К.М. и 23-годишниот Б.М. од село Јосифово. Со судска наредба биле извршени претреси и во домот на двете лица, како и во деловен објект користен од К.М., каде биле запленети различни пакувања со марихуана и хашиш.
Вкупно, од сите локации биле одземени околу два килограми марихуана и хашиш. Лицата се задржани во полициска станица, а по документирање на случајот, против нив ќе биде поднесена кривична пријава.
