Францускиот претседател Емануел Макрон најави иницирање забрзана законска постапка со која би се вовела забрана за користење социјални мрежи за деца и тинејџери помлади од 15 години, со цел мерката да почне да се применува уште од следната учебна година.
Во видео-обраќање до јавноста, Макрон соопшти дека побарал законот да се разгледува по итна постапка во парламентот, што би овозможило негово брзо усвојување. Тој нагласи дека станува збор за јасна и јавно преземена политичка обврска, насочена кон заштита на децата од негативните влијанија на дигиталниот свет.
„Ќе го забраниме користењето социјални мрежи за деца под 15 години и ќе воведеме целосна забрана за мобилни телефони во средните училишта. Ова правило мора да биде јасно за тинејџерите, родителите и наставниците“, порача Макрон.
Претседателот истакна дека дигиталните платформи не смеат да имаат слободен и неконтролиран пристап до вниманието на децата, потенцирајќи дека нивниот психолошки и емоционален развој не смее да биде предмет на профит.
Тој изрази и сериозна загриженост за влијанието на странските дигитални платформи и нивните алгоритми, оценувајќи дека тие сè почесто манипулираат со младите корисници.
Според најавите, уставната можност за забрзана постапка ќе овозможи значително скратување на роковите во парламентарната процедура, оставајќи простор забраната да стапи на сила веќе од следната учебна година.
