Голем дел од Соединетите Американски Држави е зафатен од екстремната зимска бура „Ферн“, која медиумите и метеоролозите ја опишуваат како една од најсилните зимски бури во последните 100 години. Невремето донесе обилни снежни врнежи, снежни бури и замрзнат дожд, предизвикувајќи целосна блокада во сообраќајот и енергетската инфраструктура.
Според податоци на Reuters и Associated Press, поради екстремните временски услови се откажани над 13.000 летови низ целата земја, а аеродромите работат со сериозни доцнења. До вечерта на 24 јануари, повеќе од 139.000 корисници останале без електрична енергија, при што бројката продолжува да расте.
Најпогодени се сојузните држави Тексас и Луизијана, каде ниските температури, мразот и снегот предизвикаа прекини во снабдувањето со струја, затворени патишта и вонредни мерки. Во Њујорк, властите потврдија дека на улиците биле пронајдени телата на три лица кои починале од последици на изложеност на студ, што дополнително ја нагласува сериозноста на ситуацијата.
Американскиот претседател Доналд Трамп одобри прогласување федерална вонредна состојба во 12 сојузни држави, од Јужна Каролина до Западна Вирџинија, и упати апел до граѓаните да останат во домовите, да избегнуваат непотребни патувања и да се заштитат од екстремниот студ.
Метеоролозите предупредуваат дека невремето ќе трае уште неколку дена, со можност за нови снежни наноси и опасни услови, додека службите за итни случаи остануваат во состојба на зголемена готовност.
