Италијанската влада прогласи вонредна состојба за делови од југот на земјата кои беа погодени од силна бура изминатата недела, најавувајќи итна финансиска поддршка за санација на инфраструктурата и помош за погодените бизниси.
Силните дождови, олујните ветрови и бранови високи и до девет метри во изминатите два дена ги зафатија Сицилија, Сардинија и Калабрија, при што беа оштетени крајбрежните заштитни бариери, а бројни внатрешни подрачја беа поплавени, пренесува Ројтерс.
Според проценките на надлежните институции, материјалната штета надминува една милијарда евра. И покрај сериозноста на временската непогода и обемот на уништувањето, засега нема пријавени човечки жртви.
Владата на премиерката Џорџа Мелони одобри почетен пакет од 100 милиони евра за итни интервенции во најпогодените региони, соопшти министерот за цивилна заштита Нело Мусумечи.
