Црна Гора е во центарот на контроверзии по објавувањето на експлицитни снимки на кои, според медиумските извештаи, се државните службеници Дејан Вукшиќ и Мирјана Пајковиќ. По појавата на снимките, двата функционери поднесоа оставки, наведувајќи „лични причини“ за нивната одлука.
Вукшиќ, поранешен директор на Агенцијата за национална безбедност (АНБ) и поранешен советник на претседателот Јаков Милатовиќ, планираше да се кандидира за уставен судија. Пајковиќ, пак, беше државен секретар во Министерството за човекови и малцински права. Нејзината оставка уследи откако видеа со експлицитна содржина беа објавени во јавноста.
По појавата на снимките следеше лавина од обвинувања, кривични пријави и дури закани, дел од кои биле упатени од фиксен телефон во канцеларијата на претседателот Милатовиќ. Пајковиќ поднесе кривична пријава против Вукшиќ за наводно неовластено дистрибуирање експлицитна фотографија од неа. Вукшиќ ги негира сите обвинувања и тврди дека Пајковиќ му го украла мобилниот телефон во октомври 2024 година, што довело до злоупотреба и контроверзна аудиоснимка од Кабинетот на претседателот.
Овој скандал ја потресе јавноста во Црна Гора и отвори прашања за приватноста и одговорноста на високи функционери.
