Американскиот претседател Доналд Трамп продолжува со жестоката реторика кон Иран, повикувајќи на дипломатски решенија, но истовремено предупредувајќи на воена акција. По насилното задушување на протестите во Иран, Трамп најави дека САД испраќаат дополнителни поморски сили во регионот, вклучувајќи го носачот на авиони „УСС Абрахам Линколн“ и придружните бродови.
На социјалната мрежа Truth Social, Трамп објави дека „огромна армада плови кон Иран“ и дека таа е „подготвена и способна да ја заврши својата мисија со брзина и сила, доколку е потребно“. Претседателот истакна дека целта е Иран „брзо да седне на маса“ и да преговара за „фер и праведен договор без нуклеарно оружје“.
„Времето истекува, тоа е навистина критично! Како што еднаш му реков на Иран, ПОДГОТОВЕТЕ ДОГОВОР! Следниот напад ќе биде многу полош!“, напиша Трамп, потсетувајќи на некогашната „Операција полноќен чекан“.
Оваа порака следуваше само неколку часа откако Трамп во говорот во Ајова најави дека уште една „прекрасна армада“ е на пат кон Иран, без да открие детали за конкретните сили.
Администрацијата на САД дополнително најави повеќедневна вежба на воздухопловните сили на Централната команда (CENTCOM) на Блискиот Исток, како дел од подготовките за потенцијална ескалација.
И покрај воените закани, Трамп повтори дека се надева на дипломатско решение, нагласувајќи ја важноста на креативните преговори пред „да истече времето“.
