Вештачката интелигенција повторно ја турна платформата X во центарот на вниманието, а Илон Маск лично се погрижи тоа да биде спектакл. Со објава што брзо се рашири, тој претстави нова можност на алатката Grok Imagine: видеа од 10 секунди со значително подобрен звук. Но, техничкиот напредок остана во сенка на нешто друго – појавата на дигитален лик што неверојатно наликува на холивудската ѕвезда Сидни Свини.
Во клипот, генериран целосно од вештачка интелигенција, женскиот лик поставува прашање за новите функции на Grok, додека машки глас потврдува дека станува збор за надградба. Сцената е едноставна, но доволна за да предизвика лавина реакции.
Она што дополнително ја разгори дискусијата е фактот дека оригиналниот автор на видеото, корисникот Алекс Патраску, никогаш експлицитно не ја спомнал актерката во својот текстуален налог. Сепак, алгоритмот „одлучил“ да создаде лик што очигледно асоцира на неа. Од таму, работите излегоа од контрола: десетици модифицирани верзии почнаа да кружат на X, некои саркастични, некои провокативни, а некои и отворено сексуализирани.
Сето ова се случува во чувствителен момент за Маск, кој неодамна беше остро критикуван поради шеги и коментари за физичкиот изглед на Свини. Новата објава, иако формално технолошка, повторно го отвори прашањето за одговорноста кога се користат дигитални копии на реални луѓе.
Grok Imagine, алатка претставена во јули 2025 година, уште од стартот крена прашина поради можноста за генерирање 18+ содржини. Критичарите предупредуваат дека границата меѓу иновација и злоупотреба станува сè потенка, особено кога во игра се познати личности и сексуализиран контекст.
