Францускиот претседател Емануел Макрон предупреди дека Европа се соочува со сериозна опасност ако продолжи да гледа од страна, наместо активно да учествува во глобалните случувања.
„Ако продолжиме само да набљудуваме, тоа не води кон сила, туку кон лесно покорување“, рече Макрон во интервју за „Зидојче цајтунг“. „Не сме агресивни кон никого, се обидуваме да одржуваме добри односи со Америка, продолжуваме како досега со Кина, но ако не дејствуваме, Европа ќе биде избришана за пет години.“
Макрон ја истакна историјата на Европа како предупредување: бавноста и поделбите често доведувале до економски и политички порази. „Земете го примерот со финансиската криза. Таа започна во САД, но ние страдавме дури десет пати повеќе. Американците реагираа брзо и колективно, додека ние бевме разделени и ни требаа години за да се опоравиме. Шокот беше асиметричен – северот и југот се соочуваа со различни проблеми, а на крајот последиците ги почувствува целата Европа“, објасни Макрон.
Според него, постојат и примери кога Европа покажала колективна сила. Тој го нагласи заедничкиот финансиски одговор на пандемијата Ковид-19 во 2020 година, кога ЕУ создаде заеднички фонд од 750 милијарди евра, што според него е доказ дека заедничкото дејствување може да го зацврсти континентот.
