Дојранското Езеро годинава го пречекува зимскиот период со засилен живот – бројот на водни птици што тука презимуваат се зголемил за околу 2.000 единки во споредба со минатата година, покажуваат податоците од годинешниот зимски попис, организиран под водство на Македонското еколошко друштво (МЕД).
Вкупно се регистрирани 6.209 птици, при што доминираат лиските, галебите и кормораните. По нив следат различни видови нуркачи и патки, кои придонесуваат за шаренилото на птичиот свет во ова природно богатство.
Зимскиот попис на водни птици се спроведува на меѓународно ниво секоја година и опфаќа трите најзначајни македонски езера – Дојран, Преспа и Охрид. Од 2010 година, МЕД ја координира оваа активност, а годинашниот попис беше 17-ти по ред во земјава, како дел од глобална програма која веќе шест децении се спроведува во 189 земји и територии.
Во пописот учествуваа експерти од националните паркови „Галичица“ и „Езерани“, претставници на албанската организација PPNEA, Друштвото за заштита на Преспа (SPP) и грчкиот Национален парк „Езеро Керкини“. Десетина научници и орнитолози, заедно со волонтери и членови на МЕД, со телескопи и бележници, бројат секоја птица, откривајќи ја динамиката на зимските миграции.
Еколозите велат дека Дојранското Езеро во последните пет години бележи умерени флуктуации во бројот и разновидноста на птиците, во споредба со Преспа и Охрид. Најчесто причините се поврзани со колебањата на водното ниво, присуството на ловџии и наглите локални климатски промени.
И годинава се забележани човечки интервенции, особено во северозападниот дел од крајбрежјето, каде земјиштето се претвора во земјоделски површини. Сечењето трска, која е важно засолниште и место за гнездење на бројни видови птици и други животни, може да влијае негативно врз природниот баланс.
Годинава се попишани повеќе од 35.300 водни птици од 44 различни видови, на ниво на трите езера. Еколозите предупредуваат дека ваквите пописи се клучни за следење на здравјето на водните екосистеми и за навремено детектирање промени предизвикани од губење на живеалишта, промени во водниот режим, загадување и климатски влијанија.
Според МЕД, растечкиот интерес за учество во пописите е охрабрувачки, бидејќи покажува дека граѓанската наука и теренската работа се сè повеќе препознаени како витални за заштита на биодиверзитетот.
