Македонската државна делегација предводена од премиерот Христијан Мицкоски заминува во Германија, каде во наредните денови ќе учествува на 62-то издание на Минхенска безбедносна конференција – еден од највлијателните глобални форуми посветени на безбедноста и геополитиката.
Во состав на владината делегација се и министерот за одбрана Владо Мисајловски, министерот за надворешна политика и надворешна трговија Тимчо Муцунски, како и министерот за внатрешни работи Панче Тошковски.
Според најавите од Владата, Мицкоски ќе има интензивна агенда исполнета со билатерални средби со европски лидери, високи државни претставници и раководители на меѓународни безбедносни организации. Во центарот на разговорите ќе биде улогата на Македонија во зачувувањето на стабилноста на Западен Балкан, со акцент на нејзиниот ангажман и кредибилитет во рамки на НАТО.
Премиерот ќе ја искористи платформата на конференцијата за јасно да ја истакне позицијата на државата во однос на европските интеграции, нагласувајќи ја потребата од предвидлив и правичен процес за полноправно членство во Европската Унија, без дополнителни билатерални условувања.
Покрај официјалните сесии, предвидени се и средби „на маргините“ на конференцијата со високи претставници на ЕУ и со шефови на влади и држави, што, според најавите, ќе биде можност за продлабочување на дипломатските и безбедносните партнерства на земјата.
