Центарот за управување со кризи информира дека обилните врнежи од дожд предизвикаа поплави на повеќе локации во Република Македонија.
Најтешка состојба е забележана во Гостивар, особено во селото Форино, каде поплавите предизвикаа значителни проблеми. Противпожарните екипи работеа цела ноќ на справување со водата, а поплавени се и земјоделски површини во селата Чајле, Турчане, Врапчиште и Беловиште.
Во Кичево, на улица Прилепска, поплавите зафатија голем број домови, при што 220 лица беа евакуирани и сместени во спортската сала „Христо Узунов“. Подрумите на повеќе куќи во населбата Подварош на улица 29 Ноември исто така беа поплавени, како и дел од објектите на локалната болница. На терен се организирани достави на храна и вода, а активни се екипи на полицијата, комуналното претпријатие и противпожарната служба со поддршка на Црвениот крст.
Во Општина Липково, делови од селото Опае се поплавени поради излевање на Слупчанска река. Слична состојба е и во селото Оризаре, но засега нема пријавени материјални штети. Во Куманово, во селото Доброшане кај мостот на Кумановска река се насобраа пластични шишиња, без непосредна опасност од излевање.
Во Општина Сарај ситуацијата е стабилна и се следи, додека во Општина Зелениково е забележано минимално излевање на Вардар кај селата Пакошево и Ново Село, без директна опасност за жителите.
Во Струмица засега нема пријавено оштетување поради дождот, но е пријавен одрон на пат кај селото Суви Лаки кон Берово, за што се известени надлежните служби.
Во Пробиштип е регистриран прекин во електричното снабдување во селата Долни и Горни Стубол, а екипите на ЕВН се на терен и работат на отстранување на дефектот.
Центарот за управување со кризи апелира до граѓаните да ја следат временската прогноза и да постапуваат согласно препораките на надлежните служби.
