По многу години скандали и контроверзии, поранешниот принц Ендрју, вториот син на кралицата Елизабета II и принцот Филип, вчера беше уапсен под сомнение за злоупотреба на јавна функција. Инцидентот се случи токму на неговиот 66-ти роденден и означува историска првост: тој е првиот висок член на британското кралско семејство уапсен по речиси четири века – последниот беше кралот Чарлс I.
Ендрју, некогаш предмет на медиумска фасцинација и нарекуван „Ренди Енди“ во таблоидите, долго време се најдуваше во центарот на контроверзии поради своите лични и деловни врски. Особено спорна е неговата поврзаност со Џефри Епстин, американски финансиски магнат и осуден сексуален престапник. Документите и е-поштата објавени од досиејата на Епстин покажуваат дека принцот, за време на службата како специјален претставник за меѓународна трговија и инвестиции (2001-2011), му предавал официјални владини документи на покојниот финансиски магнат.
Обвиненијата добија нов замав во 2015 година, кога американските судски документи тврдеа дека Ендрју имал сексуални односи со малолетничка, идентификувана подоцна како Вирџинија Робертс Џуфре. Ендрју негираше секаква средба, но неговото интервју за Би-Би-Си во 2019 година се покажа како катастрофално: објаснувањата беа неверојатни, а односот кон жртвите – ладен и несочувствителен.
Натамошните тужби на Џуфре доведоа до тоа Ендрју да се повлече од сите јавни и добротворни функции, да го загуби воениот чин и кралските титули, и да биде протеран од Кралската ложа во Виндзор. Минатата година судски документи ја открија и неговата блиска врска со бизнисмен осомничен за шпионажа за Кина, што ги загрижи британските власти.
Во октомври минатата година, кралот Чарлс III официјално му ги одзеде титулите на својот брат, но Ендрју останува осми во редот за престолот. Новата истрага која го доведе до уапсувањето е резултат на милиони страници од досиејата на Епстин објавени неодамна од Министерството за правда на САД, како и новите обвинувања во посмртните мемоари на Вирџинија Џуфре.
