Судија на претходна постапка при Основниот кривичен суд Скопје донесе решение со кое се прифаќа заедничката иницијатива на јавниот обвинител и одбраната за определување мерка куќен притвор за осомничениот Артан Груби.
Од судот информираат дека, согласно Законот за кривична постапка, судијата не можел да изрече построга мерка од онаа што ја предложило обвинителството.
Претходно, КПУ затвор „Скопје“ го известил судот дека осомничениот утрово во 09:20 часот е спроведен во установата и започнал со издржување на мерката притвор, која била определена на 17 декември 2024 година. По ова известување, судот го информирал Основното јавно обвинителство.
По барање на обвинителството, била издадена наредба за спровод на осомничениот пред јавен обвинител за сослушување. Во текот на денот, одбраната поднела предлог за замена на притворот со куќен притвор, кој бил доставен до обвинителството за мислење.
Обвинителството, кое ја води истрагата и согласно законските овластувања ја оценува соодветноста на мерките за обезбедување на постапката, доставило позитивно мислење за предлогот. На расправата, јавниот обвинител предложил изрекување поблага мерка од претходно определената.
По сослушувањето на осомничениот во присуство на неговиот бранител, судот одлучил притворот да биде заменет со куќен притвор со 24-часовен надзор, кој ќе го спроведува Министерството за внатрешни работи.
Дополнително, изречени се и мерки на претпазливост – одземање на патната исправа и забрана за издавање нов документ за преминување на државната граница.
Против ова решение, странките имаат право на жалба пред Кривичниот совет.
