Поранешниот прв вицепремиер Артан Груби утрово е лишен од слобода на граничниот премин Блаце, соопшти Министерство за внатрешни работи.
Според официјалните информации, на 23 февруари 2026 година во 06:10 часот, при влез во државата, Груби бил приведен врз основа на активна мерка „апси“. Тој е задржан за понатамошна постапка.
Од МВР информираат дека приведувањето е поврзано со истрага што се води за сомнежи за злоупотреба на службената положба, корупција и неправилности во постапки за јавни набавки, во рамки на предмет што се однесува на работењето на Државна лотарија на Северна Македонија.
Според наводите на обвинителството, предметот опфаќа одлуки и договори за кои постои сомнеж дека предизвикале значителна финансиска штета на институцијата, проценета на околу 500 милиони денари, односно повеќе од осум милиони евра. Во истрагата се посочува дека преку спорни постапки биле фаворизирани одредени економски субјекти.
Судот претходно му има одредено мерка притвор, а по него била распишана потерница поради непојавување пред надлежните правосудни органи. Од институциите засега нема дополнителни детали за текот на понатамошната постапка.
