Во Битола се појави нов бран измами со лажни лекари, кои таргетираат постари граѓани. Последниот случај го регистрираше СВР Битола, а жртва е 84-годишна жена која остана без 9.600 евра. Непознато лице ѝ се претставило како лекар и ѝ соопштило дека нејзината ќерка доживела скршеници и итно мора да се оперира. Жената, во паника, предала пари на непознат што дошол пред нејзината зграда, а потоа сфатила дека станува збор за измама откако контактирала со ќерка си.
Само еден ден претходно, 83-годишен битолчанец пријавил сличен случај во полиција. И нему му се јавил лажен доктор, кој тврдел дека неговата внука се здобила со тешки повреди и мора веднаш да биде оперирана. И овој пат, измамникот ги земал парите директно пред домот на жртвата.
Полицијата дојде до заклучок дека методот е идентичен во двата случаи. Лажниот лекар повикува, плаши со наводни итни медицински ситуации, а потоа испраќа лице за да ги земе парите од постарите луѓе.
СВР Битола соопштува дека презема мерки за пронаоѓање на сторителите и расчистување на овие измами, како и на претходни случаи поврзани со истата мода на криминал. Полицијата апелира до граѓаните да бидат внимателни и да не даваат пари во вакви ситуации.
