Европската Унија е чекор поблиску кон олеснување на мобилната комуникација за граѓаните на Западен Балкан. Европската комисија најави дека ќе побара од Советот на ЕУ зелено светло за старт на преговори со Македонија, Албанија, Босна и Херцеговина, Косово, Црна Гора и Србија, со цел укинување на роаминг-надоместоците при патувања во Унијата.
Постапката е дел од Планот за раст на Западен Балкан од 2023 година и има за цел да ја приближи регионот кон единствениот европски пазар, уште пред формалното членство на овие држави. Со укинување на дополнителните трошоци за повици, СМС-пораки и мобилен интернет, граѓаните ќе можат да останат во контакт со семејствата и деловните партнери на поедноставен и поекономичен начин.
Марта Кос, еврокомесарка за проширување, го оцени овој чекор како конкретна мерка која ја подобрува секојдневната комуникација за луѓето во регионот. Од друга страна, Хена Виркунен, извршна потпретседателка за технолошки суверенитет, истакна дека поврзувањето на Западен Балкан со дигиталниот и економскиот простор на ЕУ е суштински елемент за идната интеграција.
Веќе се започнати измени во македонското законодавството за се усогласи со европските правила за роаминг. Сепак, целосната примена ќе зависи од тоа колку институциите и техничките капацитети се подготвени да го спроведат европското право. Преговорите со ЕУ ќе се водат одделно со секоја земја, во зависност од нивната подготвеност и усогласеност со регулативите.
