Русија јавно застана зад Иран во актуелниот конфликт на Блискиот Исток, откако рускиот амбасадор во Обединетото Кралство, Андреј Келин, изјави дека Москва не е неутрална и дека ја поддржува позицијата на Техеран.
Во интервју за британската телевизија „Скај Њуз“, Келин истакна дека руските власти со голема загриженост ги следат случувањата во регионот и оцени дека западните земји имаат неправеден пристап кон конфликтот.
Според него, во меѓународната јавност се создава наратив според кој Иран е единствениот виновник за ескалацијата.
„Во моментов логиката на западните земји е таква што Иран е виновен за сè“, изјави Келин, додавајќи дека се игнорира фактот кој го започнал конфликтот.
Рускиот амбасадор тврди дека нападот бил инициран од страна на САД и Израел, а дека потезите на Техеран претставуваат реакција на таа, како што ја нарече, надворешна агресија.
„Иран само одговара на тој напад. Тоа едноставно не е праведно“, нагласи Келин.
И покрај критиките кон западните земји, тој порача дека најдобро решение во моментов е итен прекин на огнот. Според него, сите страни треба да се вратат на преговори и дипломатски напори со цел да се спречи натамошна ескалација на конфликтот.
