Светската фудбалска организација ФИФА донесе одлука да ги намали трошоците за претстојното Светско првенство, објави „The Athletic“, повикувајќи се на свои извори во организацијата. Според годишниот извештај на ФИФА за 2024 година, за периодот 2023-2026 година, првично беше предвидено Светското првенство да има оперативни трошоци од 1,12 милијарди долари и вкупен буџет од 3,756 милијарди долари, кој ги опфаќа и наградите за тимовите и телевизиските права.
Сепак, според информации од ФИФА, расходите се намалени за повеќе од 100 милиони долари, а одлуката е донесена директно од седиштето на организацијата во Швајцарија. Портпаролот на ФИФА истакна дека ваквите прегледи на буџетот се рутински и се дел од стратегијата за подобра контрола на расходите, со цел дополнителни средства да се инвестираат во глобалниот развој на фудбалот. Тој ја отфрли поврзаноста на намалувањето на трошоците со претседателските избори како „чиста фикција“.
Планот за оперативни трошоци првично вклучуваше 280 милиони долари за техничко одржување на инфраструктурата, 159 милиони за транспорт, 145 милиони за обезбедување безбедност и 79 милиони за услуги на гостите, а новата намалена сума ќе го ревидира и распределувањето на овие ставки.
