Министерката за енергетика, рударство и минерални суровини, Сања Божиновска, учествуваше на главниот настан на Европската банка за обнова и развој (ЕБРД) по повод Меѓународниот ден на жената, под мотото „No Economy Wins Running at Half Capacity: The Economic Power of Gender Equality“. Настанот се одржа во хибриден формат во седиштето на ЕБРД, а го отвори претседателката на банката, Одил Рено-Басо.
На почетокот на настанот беше истакната економската реалност која го води развојот – економиите не можат да остварат свој полн потенцијал ако половина од популацијата е ограничена во можностите за учество.
Претседателката на ЕБРД, Одил Рено-Басо, нагласи дека родовите јазови директно влијаат врз продуктивноста, отпорноста и иновацискиот капацитет на економиите.
Во своето обраќање, министерката Божиновска го поврза значењето на родовата еднаквост со зелената енергетска транзиција:
„Северна Македонија се движи кон амбициозна трансформација на енергетскиот сектор – со проширување на капацитетот за соларна и ветерна енергија, модернизација на системот и создавање почист и поотпорен енергетски систем. Но, оваа транзиција мора да биде праведна и инклузивна. Жените имаат клучна улога во обликувањето на оваа трансформација. Поголемо учество на жените во енергетскиот сектор – од инженери и претприемачи до политичари и извршни лидери – ја зајакнува одлуката, поттикнува иновации и гради поотпорни институции.“ истакна Божиновска во обраќањето.
Министерката нагласи дека промоцијата на жените во енергетскиот сектор не е само прашање на еднаквост, туку стратегиска потреба за успехот на зелената транзиција. Тоа значи повеќе жени во технички професии, повеќе жени што водат проекти за обновлива енергија и повеќе жени што обликуваат национална енергетска политика.
Министерката Божиновска се осврна и на успешниот пример од своето Министерство:
„Горда сум што Министерството за енергетика, рударство и минерални суровини е веројатно една од ретките институции во земјата каде што жените се мнозинство меѓу вработените – 78 жени наспроти 69 мажи. Во сектор кој традиционално се смета за „машки“, ова е доказ дека жените се подготвени и способни да водат.“
Таа ги истакна и конкретните резултати од обуките за праведна транзиција што ги спроведе ЕБРД во земјава каде од 620 учесници, 222 беа жени – силен показател дека жените се повеќе присутни во работната сила за енергетската транзиција.
На прашањето како институциите можат да поддржат повеќе жени лидери, министерката одговори:
„Прво, создавајте реални патеки, не симболични можности. Второ, инвестирајте во жените од рана возраст, особено во STEM образование и технички кариери. И трето – финансирајте проекти водени од жени. Кога жените водат проекти, тие не само што испорачуваат резултати, туку отвораат врата за многу други да следат.“
Министерката истакна дека партнерството со меѓународни институции како ЕБРД е клучно за унапредување на инклузивни климатски инвестиции:
„ Нашата нова Стратегија за родова еднаквост и човечки капитал се фокусира на области каде овие јазови се највидливи и каде акцијата може да донесе промена: зелената транзиција, дигиталната економија и прашања на глас и влијание.“
Министерката подвлече дека енергетската транзиција може да достигне својот полн потенцијал само ако е инклузивна и ако жените се лидери во процесот на зелена промена:
„Ако сакаме успешна и одржлива енергетска транзиција, мора да осигуриме дека жените не само што учествуваат во секторот, туку и помагаат да се води и обликува неговата иднина.“
Министерката Божиновска порача дека инвестицијата во жените не е само прашање на правичност, туку и стратегиска потреба за иднината на енергетскиот сектор: кога жените водат, тие отвораат пат за многу други, а целата економија напредува.
