Граѓаните од денеска можат директно да патуваат од аеродромот Св. Апостол Павле во Охрид до Братислава, соопшти Министерството за транспорт и врски. Оваа линија отвора нови можности за туристи и придонесува кон економски развој на регионот.
Министерот за транспорт и врски, Александар Николоски, најави дека веќе од 29 март ќе биде пуштена во употреба и нова директна линија од Охрид до Милано, што дополнително ќе го зајакне меѓународното поврзување на Македонија.
„Развојот на авиосообраќајот е еден од врвните приоритети на Владата. Преку конкретни политики и мерки, континуирано работиме на унапредување на цивилниот авиосообраќај, што резултираше со значително проширување на мрежата на дестинации“, изјави Николоски.
Тој додаде дека Владата останува посветена на подобрување на авиосообраќајот како клучен фактор за економски раст, туристички развој и поврзување на Македонија со големите европски центри.
