Генерал Падрино Лопез, кој од октомври 2014 година ја водеше одбраната на Венецуела, заминува од функцијата, оставајќи зад себе најдолг стаж како министер за одбрана во историјата на јужноамериканската држава.
Тој долго време фигурираше како еден од највлијателните воени сојузници на соборениот претседател Николас Мадуро, перцепиран како клучна карика во структуите што му овозможија на Мадуро да остане на власт.
„Голема чест ми беше да ѝ служам на татковината како војник и да го чувам националниот мир и единството во сите овие години предводејќи го Министерството за одбрана“, напиша Лопез во реакцијата на одлуката за неговото разрешување.
Покрај измените во одбранбениот ресор, претседателката Родригез изврши и кадровски промени на чело на министерствата за домување и за енергетика, без да образложи зошто ги донела овие одлуки.
Овие кадровски потреси се случуваат на пресвртница за Венецуела, во време на силни политички тензии по соборувањето на Мадуро од страна на САД. Со Мадуро надвор од политичката сцена, Родригез ја презеде власта и се наметна како главен соговорник со Вашингтон, особено кога станува збор за нафтената стратегија на земјата.
