Владата ќе преземе конкретни мерки за ублажување на најавеното поскапување на горивата, соопшти премиерот Христијан Мицкоски. Според анализите на движењата на светските берзи, се очекува бензинот од 95 и 98 октани да поскапи за околу 6,5 денари по литар, додека дизелот би можел да се зголеми за 10,5 денари по литар.
„Очекуваме цената на бензините да се зголеми на 93 и 95 денари, а дизелот од 92 на 102,5 денари по литар“, посочи Мицкоски.
За да се ублажи ударот врз граѓаните, Владата одлучи да го намали ДДВ-то за бензините и дизелот од 18 на 10 проценти. Со оваа мерка, цената на бензините ќе остане речиси непроменета, додека дизелот ќе поскапи само за околу 3 до 3,5 денари по литар.
Дополнително, Владата води преговори со компанијата ОКТА за зголемување на попустот кон трговците, што може да доведе до дополнително намалување на цените за до 3 денари по литар.
Премиерот истакна дека овие мерки ќе овозможат заштеда од околу 200.000 евра дневно, односно приближно 1,5 милиони евра неделно за граѓаните. „Ова е одлука со која директно го штитиме стандардот на граѓаните во услови на глобална енергетска криза“, додаде Мицкоски.
Според него, Македонија сè уште има најниски цени на горивата во регионот.
…
