Во Брисел се одржа 14-тиот состанок на Специјалната група за реформа на јавната администрација, на кој Република Македонија ја презентираше постигнатата динамика и резултати во клучните сфери на реформата. Темите опфатија стратегиската рамка на реформата, патоказот за јавната администрација, управувањето со јавни финансии, човечките ресурси, развојот на политики и координацијата, како и подобрувањето на услугите и транспарентноста на институциите.
Министерот за јавна администрација, Горан Минчев, во своето воведно обраќање истакна дека реформата на јавната администрација е столб на европската интеграција и клучен фактор за зајакнување на институциите во земјата.
„Нашата цел е јасна: професионална администрација, ефикасни институции и услуги кои навистина одговараат на потребите на граѓаните и бизнисите“, нагласи Минчев, потенцирајќи дека реформските активности се поткрепени со извештаите на Европската комисија и оценките на SIGMA, кои обезбедуваат вредни насоки за понатамошно дејствување.
Според министерот, извештајот на Европската комисија за 2025 година го потврдува видливиот и мерлив напредок во јавната администрација. „Македонија се движи напред. Нашите резултати се конкретни, а посветеноста на реформата е јасно видлива“, рече тој.
Минчев нагласи и дека европската перспектива на државата се развива во рамките на демократските вредности, но со цврст континуитет на националниот идентитет, јазикот, културата и историјата на Македонија. „Европската перспектива и зачувувањето на македонскиот идентитет не се спротивставени – тие се основата на силни и отчетни институции и на демократски развој“, додаде министерот.
