Во текот на ноќта кон саботата, Русија изврши еден од најмасовните воздушни напади врз Украина од почетокот на инвазијата, при што загинаа најмалку четири лица, а 29 се повредени, соопштија украинските власти.
Според украинскиот претседател Володимир Зеленски, нападот вклучувал вкупно 623 средства за напаѓање – 597 беспилотни летала, најголем дел од иранскиот модел „Шахед“, и 26 ракети. Украинските воздушни сили соопштија дека успеале да пресретнат и уништат 319 дронови и 25 ракети.
Двајца цивили загинаа во западниот град Черновци, а уште двајца во регионот Дњепропетровск во централна Украина. Меѓу повредените има и 11-годишно момче во Лавов. Воздушната тревога траела со часови, а жителите во повеќе региони ноќта ја поминале во засолништа.
Ова следува по уште потежок напад што се случи претходно во текот на неделата, кога руската армија, според Киев, употреби 728 дронови и 13 ракети во само една ноќ, фокусирајќи се главно врз западна Украина. Тој напад е опишан како најинтензивниот од почетокот на руската агресија пред повеќе од три години.
Руските удари ги зголемија безбедносните тензии и во соседна Полска, каде армијата распоредила борбени авиони и активирала сите расположиви сили за следење на воздушниот простор долж границата со Украина. Полските и сојузничките сили внимателно ја следат ситуацијата поради зголеменото руско присуство во воздушниот простор над регионот.
Западните сојузници ја осудија ескалацијата, додека Киев повторно апелира за засилување на воздушната одбрана и побрза испорака на одбранбена воена помош.
