Компанијата Самсунг го задржа водството на глобалниот пазар на паметни телефони и во вториот квартал од 2025 година, со вкупно 58 милиони испорачани уреди и пазарен удел од 19,7%, покажува најновиот извештај на Меѓународната корпорација за податоци (IDC).
Овој резултат доаѓа во период кога пазарот бележи само скромен раст од 1% во споредба со истиот квартал минатата година. Според IDC, глобалната побарувачка сè уште е под влијание на макроекономски фактори, како што се инфлацијата, нестабилноста на валутите, трговските бариери и слабата потрошувачка во Кина.
Клучни за успехот на Самсунг биле моделите Galaxy A36 и Galaxy A56, кои постигнале значителен успех на повеќе пазари, особено во сегментот на средна класа.
На второто место се најде Apple со 46,4 милиони испорачани телефони и пазарен удел од 15,7%, а Xiaomi го зазеде третото место со 42,5 милиони уреди и 14,4% удел.
Виво (Vivo) е четврти со 27,1 милион испораки, додека Transsion – компанија која стои зад брендовите Infinix, Tecno и itel – е петта со 25,1 милион уреди.
И покрај економските предизвици, IDC оценува дека овие резултати покажуваат знаци на стабилизација и потенцијален раст на глобалниот пазар на смартфони во наредниот период.
