Четири украински воени авиони ненамерно влегоа во воздушниот простор на Романија, членка на НАТО, додека избегнувале масовен руски ракетен напад во понеделникот наутро, потврди романското Министерство за одбрана. Инцидентот ја активираше воздушната одбрана на Алијансата, но не беше отворен оган врз украинските летала.
Настанот се случи за време на еден од најжестоките руски воздушни напади врз Украина досега, со повеќе од 400 ракети и дронови насочени кон различни цели, главно во западниот град Ивано-Франкивск, во близина на романската граница. Во обид да ги избегнат нападите, украинските пилоти подигнале неколку борбени авиони, од кои четири, меѓу кои најмалку еден Су-27, го преминале воздушниот простор на Романија.
Според романското Министерство, авиони биле забележани на радарите на НАТО и останале неколку минути над територијата во близина на градовите Сигету Мармацијеи и Викову де Сус, пред да се вратат во Украина.
НАТО одговори брзо – околу 03:30 часот по локално време, две романски F-16 полетаа од базата Борчеа за да го испитаат настанот. Дополнително, во 05:00 часот полетаа и два италијански авиони „Еурофајтер Тајфун“ од базата Михаил Когелничеану. До 07:00 часот сите НАТО-авиони се вратија во базите, а не беше забележана никаква штета ниту закана по безбедноста на Романија.
Украинските воздухопловни сили потврдија дека едно од нивните летала накратко влегло во романскиот воздушен простор, но не открија дополнителни детали. На социјалните мрежи се појави и видео кое наводно прикажува авион Су-27 како лета ниско над романска територија.
Претседателот на Украина, Володимир Зеленски, повторно ја осуди Русија за нападите, велејќи дека се насочени кон цивилна инфраструктура и побара дополнителни системи за противвоздушна одбрана. Ова не е прв пат елементи од војната да завршат на територија на НАТО – претходно руски дрон падна во Литванија, а романската ПВО веќе еднаш собори руски дронови над Дунав.
