Северниот дел на Кина е погоден од катастрофални поплави кои зад себе оставија десетици жртви и голема материјална штета. Според заменик-градоначалникот на Пекинг, Сја Линмао, најмалку 44 лица го загубиле животот во главниот град, а 31 лице се водат како исчезнати во Пекинг и соседната покраина Хебеј, пренесува Ројтерс.
Особено трагичен е случајот во дом за стари лица во градот Таишитун, во округот Мијун, каде загинале 31 лице. Од вкупно 69 корисници, 55 страдале од функционални оштетувања, што го отежнало нивното спасување при надоаѓањето на надојдените води. Засега не е потврдено дали има загинати и меѓу вработените.
Поројните дождови, кои започнаа пред една недела, кулминираа во последните денови. Во округот Мијун, североисточно од Пекинг, наврнале дури 573,5 милиметри дожд – речиси колку што паѓа за цела година во главниот град.
Во соседната покраина Хебеј, пријавени се уште 16 загинати. Овие поплави се најсмртоносни во регионот во последните години, надминувајќи ги трагичните настани од 2023 година кога загинаа 33 лица, и приближувајќи се на катастрофалните поплави од 2012 година кога животот го загубија 79 луѓе.
Властите се во трка со времето за да ги најдат исчезнатите и да обезбедат помош за погодените подрачја. Спасувачки тимови се активни на терен, но лизгањата на земјиштето и прекините на патиштата го отежнуваат пристапот до критичните точки.
