Тајани: Израел би направил сериозна грешка ако ја окупира Газа
Заменикот на италијанскиот премиер и министер за надворешни работи, Антонио Тајани, денеска изјави дека Израел би направил сериозна грешка доколку се одлучи на окупација на Појасот Газа.
Обраќајќи се пред новинарите во Долниот дом на италијанскиот парламент, Тајани ја повтори позицијата дека Италија не е подготвена да ја признае палестинската држава, пренесува новинската агенција Анса.
„Да се признае држава Палестина кога таа фактички не постои е правна фикција. Тоа не е ни политичка одлука“, изјави Тајани. Тој додаде дека Италија одамна поддржува решение со две држави: „Јасно е дека сме за палестинска држава – тоа го повторуваме со години.“
Според него, Италија работи на создавање услови за изградба на палестинска држава. „Веќе изнесов што е потребно да се направи и што сме подготвени да сториме. Неопходна е мисија на Обединетите нации под раководство на арапските земји, и ние сме подготвени да испратиме италијански војници. Доколку Палестина повторно се обедини, тогаш ќе може да се разговара за нејзино признавање“, нагласи Тајани.
Исто така посочи дека Италија го признава легитимитетот на Палестинската самоуправа, но дека „Хамас мора да си замине“.
На новинарско прашање за тоа како гледа на ставот на другите земји кои ја признаваат Палестина, Тајани одговори: „Секој може да зборува што сака. Но јас сум студирал право и добро се сеќавам на некои основни принципи. Погледнете ги првите три страници од дефиницијата за држава и ќе ви биде јасно.“
Четири држави – Канада, Франција, Велика Британија и Малта – најавија дека во септември ќе ја признаат Палестина како независна држава. Претходно, Шпанија, Ирска и Норвешка тоа го направија во мај 2024 година. Мнозинството земји-членки на Обединетите нации – 147 од вкупно 193 – веќе ја признаваат Палестина, која во ОН има статус на држава набљудувач.
